Seri Dioh 14

Baghu je mok letok besen ataih tanoh baih dah sampae. Deghaih mok nahan tangan. Ander empait lima oghang lain yang nunggu skali. Beghenti je baih mok angkit besen letok dekat deghaebo. Mok pegang tangan Dioh bawok ke belakang. Tempat duduk nomboi dua daghi belakang kosong. Mok sughuh Dioh duduk. Mok duduk sebeloh. Mok kesait peloh pade muka Dioh. Lepaih te muka mok pulok. Ander tige mpait oghang bedighi. Dioh jengok ke depan. Nampok dek Dioh ander ghage ghotan. Ander bunyi soghe ayang. Nok juwei de pekan saghi Temeghloh jugek agoknya. Dioh becakak soghang2 dalang ati. Dioh maling keluo tingkak. Betih Dioh begegor ngikut gegor baih. Ander bau minyok. Dioh ngaeler napaih kuat2. Lagi kuat bau minyok. Bunyi enjin baih mbingit. Kuat sangat. Ket ati Dioh lagi kuat besoghok. Baih dah mule begehok. (bersambung)